Phuahtu: K. Biaksanga
Satu: Lalnunmawia (Valtea), Lalengkawli Pautu, F Zomuanpuia
Kei zawng rairah vang hian maw,
Luahlai thu di ka hril rem thei si lo;
A pawi em dawtthu leng leh hmelma anka leng velin,
Lunglai a her tir che maw.
Aw, ka thinlai zo chhum ang,
A zing riai rairah ka tah nan maw;
A riang val sirah hnawla ngaih lung i her mai tur hi,
Famkhua ka chanpui awm e.
Hmanah kan tiam thu di zawng,
Hai reng hian ka mawi si lo dam chhungin;
Kan hlimlai ni leh ka nuih lai ni zawng kha ka dawnin,
Nau ang ka tahpui leh thin.
Ka sawm vel a min hnemah,
Thinlai na reng hi a dam thei si lo;
Lam ang letin lo hawi la, lawmlai par ang min hlan la,
Thinlai na zawng a dam ngei ang.
Hmangaih vangin lalnunnem,
Banah ka vuan ang che, dam takin aw;
Khuanu lengin min hual zel se, nang nen hian run hmunah,
Lendun hi ka nuam ve e.
